ЛЕМЛЕТ МАЛПАНЭ
Ӵукна возь вылэ васькыса
Адӟи италмас сяськаез.
Лемлет италмас но будэ вылэм
Ӝужыт вож-вож турнын.
Эн пӧя, сюлмы,
Эн оскы солы,
Лемлет италмас сяськалы.
Ӵукна возь вылэ васькыса,
Кылӥ тюрагай куараез.
Лемлет тюрагай но кырӟа вылэм
Шулдыр гужем гуръёсын.
Эн пӧя, сюлмы,
Эн оскы солы,
Лемлет тюрагай гуръёслы.
Ӵукна возь вылэ васькыса,
Егит нылмуртэ пумитай.
Лемлет дэремен, лемлет айшетэн,
Йыраз буртчин кышетэн.
Егит дауре,
Лемлет малпанэ,
Лемлет ке но со, ӟаректэ.
Ӵукна возь вылэ васькыса,
Чылкыт ошмеслы мон пайми.
Кезьыт ошмеслэн чылкыт вуэныз
Буйгаз лемлет малпанэ.
Тон оскы, сюлмы,
Чылкыт ошмеслы -
Кезьыт вуэныз шунтӥськы.