Canta pe' mme stanotte 'na canzona,
Tu ca sì bella e tiene 'a voce d'oro!
Cantammella stanotte e ca si moro,
Moro sentenno 'na bella canzona!
Canta 'na serenata 'e marenare
Ch' 'a tantu tiempo nun se canta cchiù!
Mare! Stanotte quanta varche a mare!
Ma tu nun cante. Ma a che pienze tu?
E pecché chiagne si 'a nuttata è bella
E sì figliola e tiene 'a voce d'oro?
Canta pe' me, pe' me ca mme ne moro,
Moro sentenno 'na canzona bella!
Canta, luntana mia, ca sì turnata,
Ca sì turnata e nun te ne può ghì!
Canta, pecché te tengo 'ncatenata,
Pecché tu sola mm'hê 'a vedè murì!
